罰球王入魔？曼聯90%機會簽查漢奴古

《串績王》新登場，最強博彩盤路過關神器：http://win.on.cc/football/　

曼聯中場線人才濟濟，今季新加盟嘅雲迪碧克都冇太多上陣機會，不過德國傳媒爆料，曼聯正同效力AC米蘭嘅土耳其中場查漢奴古接觸，準備明年夏天簽入回復自由身嘅佢，而且據報轉會成事機會高達90%！

德國《圖片報》著名記者科克日前爆料，指曼聯同查漢奴古嘅接洽已經去到「非常深入」嘅階段：「曼聯喺剛過去嘅夏天，已經同查漢奴古經理人進行洽商，其實祖雲達斯都有斟介，不過查漢奴古一口拒絕，因為佢知道自己將會喺明年過檔曼聯。」被問到明年見到查漢奴古穿起曼聯球衣機會有幾大，科克直接表示「90%！」

現年26歲嘅查漢奴古今季狀態大勇，為AC米蘭上陣13場有4入波同4助攻，佢嘅創造力同罰球技術係最大賣點。意大利《都靈體育報》早前指曼聯打算向查漢奴古開出5年合約，呢位土耳其中場之前拒絕AC米蘭開出嘅54,000鎊周薪新約，加上佢可以自由身轉會，相信如果簽約曼聯，人工可能會係AC米蘭嘅幾倍。