利物浦急救防線　2.8億搶購阿積士中堅

《英超刨績王》加強版，最強數據一網打盡：http://win.on.cc/football/　

利物浦今季備受防線傷兵問題困擾，特別係中堅華基爾雲迪積克重傷長抖，對球隊打擊最大，根據外媒報道，紅軍計劃明年1月轉會市場重開之後，就會收購中堅，頭號目標係阿積士新星舒侯亞斯。

21歲嘅舒侯亞斯2年前已由青年軍提升上阿積士一隊，呢位身高1米91嘅中堅今季為呢支荷甲勁旅踢咗8場聯賽及3場歐聯，屬於防線主力。

由於舒侯亞斯將於2022年約滿，加上佢仍然未同球會傾續約問題，似乎有意離隊，令利物浦有機可乘。

據悉，利物浦提出用3,000萬歐元(約2.8億港元)收購舒侯亞斯，阿積士亦願意傾呢單交易。事實上，阿積士一向以出售球員賺大錢聞名於世，近年已先後出售馬菲斯迪歷特、法蘭基迪莊、薛耶治、雲迪碧克等主力畀豪門，所以只要利物浦出得起錢，阿積士絕對唔介賣埋舒侯亞斯。