港超聯　理文大計望打造「真·主場」

今季理文回歸將軍澳運動場作為主場，周日（29日）聯賽對陣強敵東方龍獅一役，將會是球隊今季首次於地頭出擊。對此，主教練陳曉明難掩興奮心情，並強調理文想紮根將軍澳的心願，表示希望靠球隊上下之努力，為區內足球發展出力同時，可打造理想中的「真·主場」。

闊別一季後，理文重返將軍澳運動場作為主場，主教練陳曉明坦言非常期待：「一路以嚟，理文都係以將軍澳作為訓練同埋外援嘅聚居地，甚至球會儲存物品嘅地方。喺將軍澳打，感覺上我哋唔需要舟車勞動。將軍澳運動場嘅草地質素，暫時係咁多嗰港超聯球場中最好嘅，適合我哋地面推進嘅打法，球場大啲，令到我哋更容易發揮所長。加上將軍澳運動場嘅設施，包括更衣室等其他配套，都比其他運動場好，所以無論球場內外，我哋都期待喺呢度比賽。」

早前陳曉明與行政經理周文健，親身出席西貢區議會社區營造及社會創新委員會會議，正式代表理文申請區議會授權，成為來年代表西貢區的區隊。香港本地頂級聯賽於約10年前開始實行主客制，各隊根據所代表地區及聯賽成績分配所屬球場，然而除了個別區隊偏向使用該區球場作主場之外，旺角大球場及香港大球場兩個較受歡迎的場地，就成為各隊以成績論英雄的兵家必爭之地，但陳曉明認為有必要重新審視主場概念：「咁多年入面，足總對主場呢樣嘢，除左畀個場你比賽，可以着件主場波衫之外，所謂嘅主場，只不過係一個掛名。要去到另一層面嘅主場，我哋就要靠自己嘅努力。」

這位第三季執教理文的主教練，分享了球會在區內發展的願景：「既然我哋選擇得用將軍澳做主場，咁係唔係即係話我哋想推廣多啲人入場，我哋要有主場優勢，自然我哋就要推廣去周邊地理環境。將軍澳係我哋主要目標，當然將軍澳亦係西貢區一份子，所以最後我哋就選擇西貢區，希望佢哋可以支持我哋，落去地區做多啲推廣工作，幫地區去做發展，希望多啲將軍澳居民認識呢一隊波，亦都可以更容易接觸足球訓練，從而對足球產生興趣。」

陳曉明希望有朝一日，能見到在將軍澳區成長的球員，成為香港隊一員：「細細嗰係將軍澳打起嘅香港隊成員，好似暫時都未見到，你會聽過喺例如大埔出身嘅球員，我哋希望可能透過呢種嘅願景，日後真係有人透過喺呢度嘅青訓，發展成為職業球員，甚至代表香港隊。」他表示若理文成為區隊，並得到民政事務局資助，該筆資金只會用喺做地區推廣，協助地區足球發展，而非用於職業隊日常運作：「就係因為呢哋錢嚟自地區，我哋就要用番喺地區。」