港超聯　261日後再領軍　郭嘉諾：掛念球賽

周六（28日）港超聯尾場，天水圍飛馬作客以1比0擊敗晉峰，取得大敗過後首場勝仗。今仗亦是飛馬主帥郭嘉諾，自10月赴內地考牌後，首次在現場親自督師。

天水圍飛馬上場在主場大敗予冠忠南區0比4，今場造訪晉峰以1球力克對手。主帥「嘉諾Sir」被問到勝局是否對其個人一個好開始，他認為勝利屬於球隊：「唔關自己事，呢場係球隊好及時嘅3分，之前1場踢得唔好，可能要用5場嚟建立番信心，而呢場就係第1場，希望球員逐步做番好，我頭先都同球迷承諾之後會做好啲。」

「嘉諾Sir」上月中赴內地應考教練牌照，闊別球隊40天期間，一直透過線上會議領軍，周一他終於完成回港後14天隔離歸隊。他表示不想外界覺得他回來後，所有事情皆完全改變，只期望自己能令球員在比賽間更加專注。「嘉諾Sir」指自己嘗試將Pro License的內容運用於今場賽前訓練上，但自言為球員營造防守壓力不容易，今日亦見到球員的心態調整更佳，未來一仗「足總盃」對理文是真正考驗。

今仗除了是他回港後首次督師外，亦是自今年3月12日，他帶領佳聯元朗出戰上屆「足總盃」後，再次在場上領軍。對於相隔261天後，再次在場邊指揮球隊，他坦言掛念球場的感覺：「好開心返番球場，感覺好唔同，之前喺線上會議同球員講嘢，都唔及我依家咁。我好掛住呢個感覺，亦都好慶幸依家仲可以喺比賽上，所以都希望未有班落嘅教練同球員講，唔好氣餒。」