夏薩特傷出+門將派膠！皇馬輸得慘

《串績王》新登場，最強博彩盤路過關神器：http://win.on.cc/football/　

周末歐洲波連場爆冷，4支上季聯賽冠軍齊失分！繼利物浦之後，皇馬、祖雲達斯、巴黎聖日耳門都出事，當中以西甲豪門皇馬最慘烈，身價達1億歐元嘅球星夏薩特又受傷，加上門將泰拔高圖爾斯出醜，犯下低級錯誤失波，最終主場1比2不敵艾拉維斯，爆出9倍冷客W。

皇馬上場歐聯作客擊敗勁敵國際米蘭，但今場西甲返回主場，表現卻走晒樣，開賽5分鐘就有拿祖費南迪斯喺禁區內犯手球，被吹罰12碼，艾拉維斯由盧卡斯佩雷斯主射入網。

皇馬禍不單行，踢到28分鐘剛傷愈復出不久嘅夏薩特又受傷，退下火線，咁都唔止，下半場開波4分鐘，門將泰拔高圖爾斯接應回傳後，竟然兜口兜面誤傳畀對手祖斯盧辛馬田，後者當然唔客氣，第一時間射入空門，「銀河艦隊」今場真係攻守都「自爆」。

雖然皇馬喺86分鐘，由卡斯米路近門射入追番1球，但為時已晚，最終輸1比2，連續3場聯賽失分，已經落後榜首皇家蘇斯達6分，衞冕之路難行。