祖記收起C朗即出事　遭魚腩球隊逼和

足球博彩神器，每日重心提供盡在《彩報》：http://win.on.cc/football/　

祖雲達斯教練派路玩留力，玩出火，喺周日(29日)凌晨意甲，作客對弱隊賓尼雲圖，以為好易踢，事先張揚收起巨星C朗，點知陷入苦戰，被呢支新升班球隊逼和1比1，仲有射手艾華路莫拉達食紅牌，下場意甲需要停賽，無緣「都靈打吡」對拖連奴。

賽前派路稱C朗有疲態，所以今場畀佢休息，連後備都冇份，由艾華路莫拉達、保羅戴巴拿合作攻堅，初時效果唔錯，21分鐘艾華路莫拉達左路起腳射入，呢位西班牙國腳今季各項賽事，上陣10場入8球，僅比C朗少1球。

由前祖雲達斯名宿恩沙基執教嘅賓尼雲圖，傾力反擊，先有舒亞達利拿勁射中柱，跟住上半場補時，由右閘列迪斯亞上前射入靚波扳平1比1。

換邊之後，祖雲達斯雖然壓住對手來攻，但都入唔到波，當球證柏斯哥吹完場時，艾華路莫拉達疑似出言不遜，被柏斯哥出示紅牌，認真無謂。

祖雲達斯今場失分突顯有「C朗依賴症」，C朗今季上陣7場比賽，祖記取得5勝2和，每場平均入2.57球，佢缺陣嘅5場比賽，只有1勝3和1負，每場平均入1球，所以派路下次都係唔好亂收起C朗。同埋祖雲達斯今季5場聯賽作客只有1勝，亦係球隊一大死穴。

賓尼雲圖早前曾經聯賽4連敗，但繼擊敗費倫天拿之後，今場又喺祖雲達斯身上搶到分，表現有明顯改善，恩沙基教波功力，似乎更勝前國家隊隊友派路。