曼城狂炒般尼5蛋　創113年紀錄

《英超刨績王》加強版，最強數據一網打盡：http://win.on.cc/football/　

利物浦和波失分之後，勁敵曼城大發神威，主場以5比0大勝般尼，取得今季最大勝仗，翼鋒馬列斯上演帽子戲法，成為自2014年耶耶托尼之後，曼城史上第2位喺英超「戴帽」嘅非洲球員。

曼城亦係繼1907年諾士郡之後，英格蘭聯賽史上第2支連續4次主場贏同一支球隊5球或以上嘅球隊。諾士郡曾於1893年10月至1907年2月，連續4次主場贏維爾港「5球+」。

曼城經過前2場聯賽失分畀利物浦同熱刺之後，今場對弱隊般尼，盡情數胡，馬列斯開波22分鐘內已經梅開二度，班捷文文迪、費倫托利斯各建一功，踢到69分鐘，馬列斯完成帽子戲法。

呢位29歲阿爾及利亞國腳「戴帽」之後，喺英超累積創造超過100個入球，包括射入61球及41次助攻，成為繼杜奧巴、艾迪巴約、耶高保、沙迪奧文尼、穆罕默德沙拿之後，第6位喺英超創造入球破百嘅非洲球員。

另外，奇雲迪布尼今場貢獻2次助攻，曼城火力全開，發力急起直追。