為迪奧普而戰！富咸爆冷擊敗李斯特城

《串績王》新登場，最強博彩盤路過關神器：http://win.on.cc/football/　

周二(1日)凌晨英超出現爆冷賽果，賽前排尾2嘅富咸作客以2比1擊敗前列勁旅李斯特城，爆出5.5倍客W。富咸前鋒盧卡文入波之後，高舉日前不幸病逝嘅柏巴迪奧普球衣，悼念呢位曾經效力富咸嘅塞內加爾名將。

李斯特城原本今場只要贏波，就可以追至同榜首熱刺同分，但踢到30分鐘先失守，盧卡文接應隊友森保安古沙妙傳，單刀射入，呢位23歲英格蘭前鋒立即跑到場邊，高舉塞內加爾19號球衣，向日前病逝、終年42歲嘅柏巴迪奧普致敬，柏巴迪奧普曾於2004至07年效力富咸。

盧卡文入波後僅過8分鐘，富咸獲得12碼，由艾雲卡華利路主射入網，領先2球。李斯特城要踢到86分鐘，先至由哈維班尼斯入波破蛋，遭受英超2連敗。富咸升上尾4，搶到護級重要3分。