巴塞腳法最差球員　變高效殺手

《串績王》新登場，最強博彩盤路過關神器：http://win.on.cc/football/　

巴塞隆拿今季表現未如理想，但有1位球員卻備受讚賞，佢就係後備前鋒巴夫韋迪，呢位29歲丹麥國腳最近151分鐘為巴塞上陣，射入3球，效率非常高，由冷板球員躍身一變成為高效殺手。

巴塞隆拿今年2月用1,800萬歐元毀約金，向雷加利斯買斷巴夫韋迪，當時只為舒緩鋒線人腳不足嘅問題，佢上季西甲為巴塞上陣17次只入1球，被網民譏諷為「巴塞腳法最差球員」，一度有傳會方準備放棄佢。

幸好巴塞冇放走巴夫韋迪，由於新星安素法迪重傷長抖，令巴夫韋迪近期獲得唔少上陣時間，上場西甲對奧沙辛拿，佢為球隊打開紀錄，上輪歐聯對基輔戴拿模，更加梅開二度。

巴夫韋迪唔止把握力強，而且可以發揮中鋒作用，為美斯同基沙文「開路」創造入球機會，令巴塞進攻更加多元化。巴塞隆拿將於周四(3日)凌晨歐聯作客費倫斯華路士，相信巴夫韋迪又可以數胡。