利物浦新星發光　贏阿積士首名出線

《英超刨績王》加強版，最強數據一網打盡：http://win.on.cc/football/　

利物浦喺周三(2日)凌晨歐聯D組賽事，主場出擊憑「 新謝拉特」居迪斯鍾斯一箭定江山，主場1比0小勝荷甲勁旅阿積士，以5戰得12分提前鎖定首名出線資格。利物浦今場排出3位小將，除入波嘅居迪斯鍾斯，臨危受命嘅愛爾蘭門將基利靴同樣功不可沒。

「紅軍」今場派居迪斯鍾斯同右閘尼高威廉斯正選上陣，由於巴西門將艾利臣比加開賽前受傷，愛爾蘭22歲門將基利靴亦意外登場。居迪斯鍾斯今場表現活躍，上半場已經有遠射中柱，去到58分鐘更乘阿積士門將奧拿拿出迎「打空氣」，輕鬆門前撞入。完場前阿積士有追平良機，但亨特拉爾嘅必入頭槌畀基利靴神勇救出，利物浦得以贏波出線。

利物浦領隊高普賽後大讚基利靴：「我話畀球隊知基利靴做正選嗰陣，大家都好平靜，當然比賽同練習係唔同，我對於基利靴嘅處理、冷靜同技術都好開心，佢打咗一場好好嘅比賽。」