C朗第750球！自爆成功秘訣

《串績王》新登場，最強博彩盤路過關神器：http://win.on.cc/football/　

周四(3日)凌晨歐聯G組，賽前已經穩奪出線權嘅祖雲達斯，仍然派出巨星C朗踢正選，呢位葡萄牙球王射入1球，職業生涯累積入750球，同時以71球，超越美斯(70球)，成為歐聯史上主場入波最多嘅球員，結果祖記大勝基輔戴拿模3比0。

祖雲達斯上半場21分鐘，由費達歷高基艾沙頂入打開紀錄，之後C朗有1次起腳中楣唔入，以及勁射被對方門將托出底線。

不過，C朗不斷努力始終有回報，下半場費達歷高基艾沙右路傳中，佢遠柱近門撞入，之後輪到艾華路莫拉達入波，為祖雲達斯贏夠3比0。

35歲嘅C朗喺球員生涯1028場正式比賽，入咗750球，包括球會賽事入648球，國家隊賽事入102球。另外，C朗喺歐聯已累積入132球，屬於史上第一，已經拋離宿敵美斯14球。

賽後，C朗喺社交網發文話：「750個入球、750個快樂、750個球迷笑臉，感謝所有幫我達到呢個成績嘅人，感謝對手，令我每日更加努力。」