美斯接班人係佢？巴夫韋迪連續3場入波

足球博彩神器，每日重心提供盡在《彩報》：http://win.on.cc/football/　

周四(3日)凌晨歐聯G組，賽前已經提早取得出線權嘅巴塞隆拿，收起球王美斯，作客一樣以3比0大勝費倫斯華路士，分組賽5戰5勝。「光頭前鋒」巴夫韋迪今場又入1球，呢位29歲丹麥國腳已經連續3場入波，莫非佢先至係美斯嘅真正接班人？

開波14分鐘，佐迪艾巴左路傳中，基沙文近門射入，6分鐘之後，輪到奧士文尼迪比利左路傳中，今次改由巴夫韋迪飛剷入網，佢繼上輪歐聯對基輔戴拿模，個人梅開二度，以及上場西甲對奧沙辛拿，為巴塞隆拿打開紀錄之後，今場又入波，換言之近3場已經有4球進帳，論近況仲fit過美斯。

咁都唔止，巴夫韋迪之後仲博到12碼，由奧士文尼迪比利射成3比0。巴夫韋迪今年2月由雷加利斯加盟巴塞隆拿，原本只被視為臨時後備，估唔到依家變成主力殺手，夠晒戲劇性。

巴塞隆拿贏波之後，近3場比賽全勝，轟入11球兼冇失波，有復甦之勢。