夏蘭特韌帶受傷　緣盡今年餘下賽事

足球博彩神器，每日重心提供盡在《彩報》：http://win.on.cc/football/　

周四(3日)凌晨歐聯F組，多蒙特主場對拉素，開賽前突然唔見射手艾寧夏蘭特身影，根據多蒙特教練法夫爾透露，原來呢位挪威國腳喺開賽前最後1次訓練之中受傷，而且傷及韌帶，將缺陣今年餘下賽事。

法夫爾話：「艾寧夏蘭特喺明年1月初之前，都唔可能參加比賽。」意味佢將錯過多蒙特今年餘下6場比賽，至於能否趕及明年1月10日凌晨德甲對爭標勁敵RB萊比錫，仍然係未知之數。

艾寧夏蘭特今季各項賽事，上陣14場射入17球，佢受傷對多蒙特而言，絕對係重大打擊。

至於今場歐聯，多蒙特上半場末段由拉菲爾古里路打開紀錄，換邊之後，拉素靠恩莫比尼射入12碼，逼和1比1。由於最後1輪第2位拉素對第3位布魯日，多蒙特已經夠分，提早穩奪出線權。