英超首隊球迷回歸　阿仙奴4比1大炒迅速

《串績王》新登場，最強博彩盤路過關神器：http://win.on.cc/football/　

自今年3月新冠肺炎疫情大爆發後，英超球隊終於再有觀眾入場！周五(4日)凌晨歐霸盃B組賽事，阿仙奴成為英國政府宣布觀眾可以有限度入場後，第1支受惠球隊，有2,000名球迷去到酋長球場睇呢場賽事，「兵工廠」亦冇令擁躉失望，4比1大勝維也納迅速，繼續保持今屆歐霸盃100%勝率。

賽前已經拎到出線資格嘅阿仙奴，今場換晒正選11人，開波10分鐘就有拿卡錫迪炮彈式遠射先開紀錄，重傷初愈嘅西班牙中堅柏保維拿18分鐘接應角球頂成2比0，44分鐘尼基迪亞再入1球，半場已經大局已定。維也納迅速47分鐘有日本球員北川航也破蛋，不過阿仙奴小將伊美路維66分鐘埋齋，阿仙奴輕鬆大勝4比1，5戰全勝鎖定首名出線。

阿仙奴領隊阿迪達賽後表示：「呢場波好特別，好開心球迷終於返嚟，今場有2,000個觀眾，但感覺係有更多球迷，佢哋對呢場勝仗都有好大貢獻，球員都話感受到觀眾嘅支持同能量，好多謝呢班球迷到臨。」