蘇恩古復出15分鐘即傷　狐狸慘情

足球博彩神器，每日重心提供盡在《彩報》：http://win.on.cc/football/　

李斯特城近期成績低迷，周五(4號)歐霸盃喺已經出線之下，作客0比1輸畀索爾亞，「狐狸」今場最傷嘅唔係輸波，而且啱啱傷愈復出嘅土耳其中堅蘇恩古，只係踢咗15分鐘就再次受傷，估計又要抖多一段時間，對李斯特城無疑係一大打擊。

蘇恩古上季已經成為球隊後防核心，不過自10月份國際賽期受傷後，一直養傷到今場先至復出，點知正選上陣只係踢咗15分鐘，跑動期間突然痛苦坐低按實鼠蹊部，經軍醫治療後證實唔可以繼續比賽。李斯特城領隊羅渣士賽後否認太早用蘇恩古：「佢今次係鼠蹊部受傷，佢賽前通過晒所有檢測，隊醫亦話佢完全冇問題，蘇恩古都好渴望上陣，可惜佢似乎拉傷鼠蹊肌肉，實際傷情要等返去再做詳細檢查。」李斯特城周日晚會喺英超作客錫菲聯，蘇恩古將會缺陣。