洛里斯受傷　「黃大仙」赫特隨時登場

《串績王》新登場，最強博彩盤路過關神器：http://win.on.cc/football/　

熱刺喺「北倫敦打吡」大戰阿仙奴前傳出壞消息，法國門將洛里斯受到傷患困擾，周一(7日)凌晨嘅大戰上陣成疑，後備門將赫特隨時要頂上，但呢位前英格蘭國腳周中喺歐霸盃2度犯錯失波，令球迷擔心佢會成為熱刺死穴。

英國傳媒報道，洛里斯依家受到傷患影響，周中歐霸盃都冇隨隊出征，雖然熱刺一向用赫特喺歐霸盃把關，但之前幾場作客洛里斯都有隨隊，今場就神秘「失蹤」；消息指熱刺領隊摩連奴已做準備，赫特有可能會今季首次喺英超披甲。

赫特今季喺盃賽有6次上陣，表現不過不失，但周中作客寧斯竟然3次畀對手喺禁區外射門攻破，其中2球佢都要負上一定責任，不過呢位33歲老將一向出名係「神經刀」，話唔定嚟緊場英超會有超水準演出。