謝拉特又贏　今季3度當選每月最佳

足球博彩神器，每日重心提供盡在《彩報》：http://win.on.cc/football/　

蘇超賽會周五(4日)宣布11月最佳獎項，結果唔使問都知，執教格拉斯哥流浪嘅前利物浦「神奇隊長」謝拉特，順利當選11月最佳領隊，數番轉頭，蘇超開季4個月，謝四今季已經3度當選，計埋上季同前季，呢個係佢第6座最佳領隊獎座。

格流今季走勢強勁，開季至今15仗13勝2和不敗，暫以11分但多踢2場領先宿敵些路迪。講番謝拉特今次攞獎，係計佢11月戰績，格流上個月在蘇超3連勝，包括8比0狂數咸美頓，聯賽盃亦大炒福爾柯克4蛋。

單係今季，謝拉特已獲得8月、10月同11月最佳領隊，再數番上2季，佢喺2019年4月、9月、12月都攞過最佳領隊，總共6次，不過睇格流走勢，今季會一直贏落去，謝四嘅每月最佳獎座，只會愈來愈多。

謝拉特成績愈好，利迷愈開心，事關大家都認為高普卸任後，謝拉特最佳繼任人，一早視佢為紅軍未來主帥。