基奧特又入波　追平名宿19年前紀錄

《串績王》新登場，最強博彩盤路過關神器：http://win.on.cc/football/　

「銀河唯一」基奧特又入波！呢位34歲老將繼上周中歐聯對西維爾，包辦4個入球之後，喺周日(6日)凌晨英超又射入1球，協助車路士主場以3比1擊敗列斯聯。基奧特亦成為自2001年10月哈索賓基之後，車仔近19年首位連續6次踢英超正選都取得入球嘅球員。

開波4分鐘，車路士防線出現犯錯，中堅葛特蘇馬同出迎嘅門將艾度亞文迪發生誤會，結果被列斯聯前鋒班福特射入空門。幸好狀態大勇嘅基奧特近門建功，迅速為車仔扳平，換邊後，葛特蘇馬將功補過，頂入角球，加上基斯甸普列錫補時入波，車路士反勝3比1。

基奧特自然又成為主角，佢近年雖然經常屈居後備，但每次上陣都有唔少貢獻，其中近6次英超踢正選都有波入，並以34歲零66日成為創出此成績嘅最老球員 ，相信領隊林柏特嚟緊都要重用呢位老將。

不過，車路士贏波亦付出代價，中場薛耶治受傷，未知要抖幾耐。