丹尼艾格斯復出獻絕殺　聖人拎1,000分

《串績王》新登場，最強博彩盤路過關神器：http://win.on.cc/football/　

周二(8日)凌晨英超獨腳戲，修咸頓作客以2比1反勝白禮頓，傷愈復出嘅王牌射手丹尼艾格斯後備入替攻入致勝球，再次做「聖人」贏波英雄。修咸頓贏波後以11戰得20分升上聯賽榜第5位，更令球會成為第11支喺英超累積拎到1,000分嘅球會。

白禮頓主場出擊有好開始，德國中場柏斯高哥斯26分鐘操刀12碼先開紀錄，修咸頓完半場前由中堅維斯達加特追成平手。因傷缺陣多時嘅前鋒丹尼艾格斯半場期間上陣，去到80分鐘出現爭議12碼，修咸頓後衛獲加彼德斯禁區邊緣被踢跌，球證最初判禁區邊罰球，但VAR檢查後說服球證改判12碼，修咸頓由丹尼艾格斯主射得手，帶領球隊贏2比1。

修咸頓領隊夏辛侯迪賽後表示：「丹尼艾格斯喺嗰個時候入波好重要，喺呢啲咁緊湊嘅比賽入面，可以喺後備換入高質素球員好重要。」丹尼艾格斯係自2013年嘅列基林拔之後，第1個連續4場聯賽作客入波嘅修咸頓球員，對佢嘅信心應該大有幫助。