經理人證實普巴1月求轉會：曼聯生涯已完！

《串績王》新登場，最強博彩盤路過關神器：http://win.on.cc/football/　

曼聯喺歐聯大戰RB萊比錫前，法國中場保羅普巴又成為話題人物！保羅普巴嘅經理人拉奧拿公開表示，呢位法國國腳喺曼聯過得唔開心，要求1月轉會重新開始，否則曼聯要面臨畀佢免費離隊嘅危險，拉奧拿更直言：「保羅普巴曼聯生涯已完結。」

著名嘅「麻煩友」經理人拉奧拿，日前公開表示：「我可以話保羅普巴嘅曼聯生涯已經完結。我覺得大家應該講清楚，展望將來，唔好再浪費時間去搵人問責。保羅普巴喺曼聯並唔開心，佢已經冇辦法盡情釋放自己，佢需要轉換球會、需要有新鮮嘅空氣。保羅普巴同曼聯仲有18個月合約，但我認為最好嘅方法，就係喺下一個轉會窗轉會，曼聯知道保羅普巴冇意思續約，明白未來有免費畀佢離隊嘅風險。」

英格蘭名宿加歷查、瑟頓等對於拉奧拿嘅言論表示驚訝同不滿，據報曼聯如果決定賣走保羅普巴，將會要求收番接近8,900萬英鎊嘅收購價。