球證涉種族歧視 PSG巴沙克舒希拉隊離場

20201209
東網電視
更多新聞短片
《串績王》新登場,最強博彩盤路過關神器:http://win.on.cc/football/ 
周三(9日)凌晨歐聯H組出現罕見一幕,巴黎聖日耳門(PSG)主場迎戰土耳其勁旅巴沙克舒希,比賽只係踢咗14分鐘即告腰斬。巴沙克舒希嘅喀麥隆籍助教韋保,指控第4裁判用種族歧視字眼侮辱佢,巴沙克舒希職球員持續抗議,最終決定拉隊離場罷踢,PSG球員亦都加入聲援,令賽事被逼腰斬。歐洲足協證實賽事會喺周四(10日)凌晨補踢,會由全新球證團隊執法餘下時間比賽。
據報事發嗰陣,嚟自羅馬尼亞嘅第4球證高迪斯古提示球證向韋保出示紅牌,期間講咗句「罰呢個黑人」,而且係用咗一個貶低黑人嘅字眼,引起巴沙克舒希後備席強烈不滿,丹巴巴亞就被影到激動質問球證:「你永遠唔會講『呢個白人』,只會講『呢個人』,咁點解你特登要講『呢個黑人』?」經過約10分鐘持續抗議後,巴沙克舒希決定全體離場抗議,PSG球員隨後亦加入罷踢,中堅派斯奴甘佩比亦被拍到講:「咩話?佢(高迪斯古)係認真架?我哋都加入!」派斯奴甘佩比同基利安麥巴比,隨後都喺社交網貼出「向種族歧視說不」嘅圖片。
歐洲足協發聲明表示,將會全面調查今次事件,而呢場比賽剩低嘅76分鐘賽事,會改喺今晚補踢,球證團隊會全部作出更換。由於同組曼聯輸畀RB萊比錫後肯定出局,巴黎聖日耳門已經提前鎖定晉級資格。