愛華頓破紀錄勁蝕　班主注資2.5億鎊打救

《英超刨績王》加強版，最強數據一網打盡：http://win.on.cc/football/　

受到新冠肺炎疫情同埋冇觀眾入場影響，全球球會都面臨經濟壓力，愛華頓日前公布年度財政報告，球會錄得高達1.4億英鎊嘅稅後虧損，比起再之前1年嘅紀錄性1.12億虧損更加嚴重。除咗因為疫情問題造成約6,730萬鎊「不可預期損失」之外，球會近2年亦大事增兵，19/20球季就花咗1.13億英鎊買人，今個夏天再使多7,000萬鎊，相當豪氣。

面對嚴重財政問題，愛華頓班望莫舒利決定再加大投資，佢計劃向「拖肥糖」投資多2.5億英鎊，令佢喺球會持股量由77.2%增加至93.3%。莫舒利自2016年入主愛華頓後，先後投資約4億英鎊，早前亦「科水」5,000萬鎊助球會對抗疫情。莫舒利嘅全力支持，意味愛華頓領隊安察洛堤有機會繼續喺1月轉會市場買人。