聖誕大禮！RB萊比錫將簽匈牙利新人王

足球博彩神器，每日重心提供盡在《彩報》：http://win.on.cc/football/　

效力薩爾斯堡嘅匈牙利「新人王」施素保斯拉爾，受到多間歐洲大球會垂青，由於佢合約內有2,500萬歐元買斷條款，1月轉會幾成定局。據德國《天空體育》爆料，施素保斯拉爾已經決定加盟RB萊比錫，估計聖誕節之前可以完成交易。

20歲嘅進攻中場施素保斯拉爾近2年冒起，早前率領匈牙利殺入歐國盃決賽周，令佢人氣爆升，雖然阿仙奴、AC米蘭都想將佢收朋，但施素保斯拉爾最後都選擇「紅牛系」嘅RB萊比錫，尤其呢支德甲勁旅殺入歐聯16強，施素保斯拉爾可以繼續留喺歐聯比賽。

消息指RB萊比錫要喺下星期二前啟動施素保斯拉爾合約內買斷條款，預料聖誕節前可以完成交易，作為送畀RB萊比錫球迷最佳聖誕禮物。