門柱幫手！愛華頓破車仔17場不敗之身

《英超刨績王》加強版，最強數據一網打盡：http://win.on.cc/football/　

周日(13日)凌晨英超2支藍軍交鋒，愛華頓靠基菲爾施古臣射入12碼，主場以1比0擊敗車路士，車仔各項賽事連續17場不敗走勢結束，最開心一直係聯賽榜頭2位球隊熱刺同利物浦。

愛華頓喺今場賽前嘅6場英超輸咗4場，加上球星占士洛迪古斯受傷缺陣，以為凶多吉少，但「拖肥糖」踢到22分鐘先開紀錄，前鋒卡維特利雲被車路士門將艾度亞文迪撞跌，球證吹罰12碼，基菲爾施古臣主射入網。

愛華頓之後仲獲得幸運之神眷顧，車仔右閘列斯占士起腳，被門將比克福特撲到再中柱彈出，美臣蒙特主射罰球，同樣中柱唔入，注定車路士追唔番。

卡維特利雲仲有1次殺入禁區，被芝維爾踢跌，當時球證吹罰12碼，但經過VAR檢測之後，推翻判決，否則車路士唔止輸1球。

車路士輸波之後，仍然落後熱刺、利物浦2分，兼踢多1場，如果熱刺、利物浦可於周日(13日)晚一齊贏波，就會拉開同車仔嘅距離。