愛華頓幫埋紅軍　整死李斯特城

《英超刨績王》加強版，最強數據一網打盡：http://win.on.cc/football/　

利物浦擊敗熱刺，升上英超榜首之餘，同市死敵愛華頓都幫埋手，作客以2比0擊敗另一支爭標對手李斯特城，令紅軍嘅「一哥」位置坐得更穩。

季初表現係威係勢嘅愛華頓早前一度陷入低潮，喺5場英超輸4場，但上場擊敗勁旅車路士之後，信心返晒嚟，今場開波21分鐘，李察利臣由左路帶入中路，勁射入網，打開紀錄。

去到72分鐘，愛華頓發動角球攻勢，米克堅尼頭槌攻門，被門將卡斯柏舒米高撲出，卡維特利雲補射又中楣，最後由賀基迪補射入網，亦係呢位24歲中堅職業生涯首個英超入球，幫愛華頓奠定2比0勝局。

英超周中快車展開之前，利物浦只係領先李斯特城1分，依家拋離「狐狸兵團」4分，愛華頓成為紅軍嘅「恩人」。