贏費歷克做最佳教練　高普：我唔值得！

足球博彩神器，每日重心提供盡在《彩報》：http://win.on.cc/football/　

周五(18日)凌晨國際足協頒獎禮，利物浦領隊高普險勝拜仁慕尼黑教練費歷克，破天荒連續第2年獲選為最佳教練，不過高普就強調自己唔值得拎獎，表明費歷克先至係實至名歸得獎者，認真有風度！

高普上季帶領利物浦歷史性首奪英超冠軍，而費歷克就率領拜仁慕尼黑做「三冠王」，今次投票兩大名帥得分同樣係24分，不過高普因為喺國家隊教練投票入面得分較多而成功「冧莊」，成為史上第1個連續2年當選最佳教練嘅人。

不過，高普就覺得費歷克更加應該得獎：「我好震驚，我坐喺度全因我係上年得獎者，對今年再獲提名表示尊重。雖然我唔係(最佳教練)，但係拎到獎我都好開心。」高普早前喺ESPN頒獎禮又係贏費歷克當選，當時佢亦表示：「我比費歷克更值得拎獎？唔係！但係投票嘅人唔係我，或者費歷克先係正確得獎人選。」