【官宣】施素保斯拉爾簽約RB萊比錫

《串績王》新登場，最強博彩盤路過關神器：http://win.on.cc/football/　

匈牙利「新人王」施素保斯拉爾爭奪戰終於結束，德甲勁旅RB萊比錫周五(18日)宣布，佢哋已經同20歲中場施素保斯拉爾簽約4年半，據報球會係啟動佢同薩爾斯堡合約內2,500萬歐元買斷條款，當冬季轉會窗喺1月重開，施素保斯拉爾就會正式加盟。

RB萊比錫總監高斯治表示：「我哋好開心簽到施素保斯拉爾，雖然歐洲好多球會都想簽佢，但佢最終都選擇加盟RB萊比錫。施素保斯拉爾有極大潛力，可以踢中場任何位置，而且左右腳都純熟，亦具備遠射同死球能力，佢會為球隊帶嚟好大貢獻。」

RB萊比錫同薩爾斯堡都係「紅牛系」兄弟球會，RB萊比錫多年來一直接收薩爾斯堡嘅星級球員，包括今個夏天簽入南韓前鋒黃喜燦。施素保斯拉爾喺RB萊比錫會著起17號波衫。