佢真係冇得出　利物浦賣福將畀狼隊

《英超刨績王》加強版，最強數據一網打盡：http://win.on.cc/football/　

英國《The Athletic》報道，利物浦下月轉會窗重開期間，可能會畀陣中「福將」奧歷治離隊，畀佢轉會獲得更多上陣機會，以爭取入選明夏歐國盃比利時大軍。消息指佢加盟正物色前鋒嘅狼隊機會最高。

利物浦今季傷兵眾多，但全部集中喺中後場，攻擊線人腳充裕，無論幾多人受傷，奧歷治都係冇得出，據統計呢位25歲射手今季僅在英超後備上陣2次，加埋只得7分鐘，在盃賽則上陣5場，以此上陣時間，明年入選比利時大軍機會好微。

奧歷治係利物浦「福將」，主要原因係佢前季英超及歐聯都喺關鍵時刻入波，包括歐聯4強對巴塞同決賽對熱刺都有「士哥」，報道指紅軍唔會主動賣佢，但如果收到合適報價，會方將考慮放生奧歷治。

狼隊消息稱，在魯爾占美尼斯受傷長抖情況下，球隊急需一名射手，而且該隊一直都有留意奧歷治，此交易於1月成交機會唔細。