卡雲尼走甩紅牌入靚波　曼聯4強鬥曼城

《英超刨績王》加強版，最強數據一網打盡：http://win.on.cc/football/　

周四(24日)凌晨英聯盃8強大戰，曼聯作客愛華頓苦戰下，喺比賽末段連轟兩球贏2比0晉級4強，準決賽抽籤不幸抽中衛冕嘅曼城，將會進行「曼市打吡」爭奪決賽資格。

曼聯今場派出烏拉圭前鋒卡雲尼掛帥，喺般奴費南迪斯、保羅普巴同雲迪碧克3大中場支援下，全場有6次射門及4次仲中目標，包括88分鐘喺禁區外妙射先開紀錄，而安東尼馬迪爾就喺96分鐘接應拉舒福特傳送為曼聯鎖定2比0勝局。

不過卡雲尼有機會做贏波英雄真係執到，事關佢喺下半場早段時間，曾經用手叉住愛華頓中堅耶利文拿頸部，將對方成個人推跌，明顯係紅牌動作，但係英聯盃依家仍然未有VAR系統，令卡雲尼可以逃過一劫。曼聯領隊蘇斯克查賽後被問到呢件事，佢就大耍太極：「兩個南美球員有過唔少對碰，好似冇幾耐之前嘅世界盃外圍賽，今場係好精彩嘅比賽，有球迷、有攔截、有黃牌，我好享受呢場波。」

4強抽籤曼聯會喺主場大戰曼城，另一場由熱刺主場鬥賓福特，準決賽會喺1月初上演。