等緊見女王　福仔：攞MBE唔會改變我

《英超刨績王》加強版，最強數據一網打盡：http://win.on.cc/football/　

曼聯球星拉舒福特喺疫情期間，積極投身社會幫助英國弱勢，確保兒童有飯食，獲頒英國MBE勳章，呢位善心球星最近接受訪問話，呢個榮譽唔會令佢改變。

今年新冠肺炎肆虐，喺疫情間福仔親身幫助唔少弱勢，亦呼籲英國政府改變學校嘅免費午餐政策，確保貧困兒童可以有飯食，拉舒福特更同超市及食品品牌合作，成立咗特別工作組去幫助貧困兒童。

呢位23歲英格蘭前鋒最近回應受勳感受時：「我細個嘅夢想都無諗過有呢個位置，亦唔係我長大後嘅目標；不過，呢個榮譽令我人生邁進一大步，我會確保自己唔會因此改變，好感激球隊、家人、朋友及國家都支持我，有啲人最需要幫助嘅時候，大家都做到團結一致，對佢哋都係一個巨大嘅榮譽。」

受勳儀式預計明年舉行，但暫時福仔未收到有關消息：「未知道，唔知道疫情幾時結束，但呢個時刻一定唔會忘記。邊個唔想同女王見面？」被問到英女王會唔會認得佢：「絕對期望，將會喺美好嘅一日。」