普捷天奴開出教PSG條件：明夏簽美斯

《串績王》新登場，最強博彩盤路過關神器：http://win.on.cc/football/　

盛傳前熱刺領隊普捷天奴將會成為法甲勁旅巴黎聖日耳門(PSG)新教練，根據法國《巴黎人報》爆料，呢位48歲阿根廷名帥向PSG開出加盟條件，就係明夏簽入巴塞隆拿球星美斯。

早前有傳普捷天奴一旦加盟PSG，就會帶埋2位熱刺舊部基斯甸艾歷臣、迪利阿里入「門」，但原來佢真正目標係同胞美斯。「肥普」一直非常喜歡美斯，但因為以往執教熱刺，財力有限，無法簽入呢位心頭好。

PSG今次邀請普捷天奴執教，正係佢實現「夢想」嘅好機會，呢支法甲豪門財力雄厚，曾以破世界紀錄2.22億歐元向巴塞收購尼馬。美斯將於明夏約滿，唔需要轉會費，PSG只需負擔佢嘅人工，更加唔成問題。事實上，PSG亦係當今球壇極少數有能力支付美斯天價薪酬嘅球會。

如果PSG答應普捷天奴要求，意味屆時球隊將擁有尼馬、基利安麥巴比、美斯「夢幻組合」，普捷天奴想點玩都得啦。