愛華頓4連勝！英超變默郡雙雄爭霸

足球博彩神器，每日重心提供盡在《彩報》：http://win.on.cc/football/　

周日(27日)凌晨英超，愛華頓憑中場基菲爾施古臣喺80分鐘入波，作客以1比0絕殺錫菲聯，取得聯賽4連勝，並趁較早時間李斯特城同曼聯打和失分，升上第2位，加上榜首屬於利物浦，形成默西賽德郡雙雄爭霸局面。

愛華頓對住包尾嘅錫菲聯，原本以為好易食，但卻老鼠拉龜，先有伊禾比遠射，被門將蘭斯達爾接實，之後仲有1次黃金機會，但首席射手卡維特利雲禁區內冇人看管，竟然射斜出界，直至80分鐘，先至由基菲爾施古臣勁射破網，一箭定江山。

愛華頓早前已經連贏車路士、李斯特城、阿仙奴，依家擊敗錫菲聯，一口氣連攞12分，重拾季初勇態，現時落後榜首利物浦2分，但踢多1場。愛華頓下場鬥曼城，對爭標非常關鍵。

至於錫菲聯今季15場聯賽仲未贏過，只有2和13負，睇怕難逃降班厄運。