馬天尼斯變鋼門　羅美路仲等咩呀

足球博彩神器，每日重心提供盡在《彩報》：http://win.on.cc/football/　

英超官網今季守門員排名，暫時排名第1係阿士東維拉阿根廷門將達米安馬天尼斯，呢位28歲門神表現出色，上陣13場共有8場保持不失，表現比艾達臣摩拉斯、洛里斯、艾利臣比加更好。

馬天尼斯原本效力阿仙奴，8月為兵工廠連奪足總盃及社區盾兩項錦標，但阿迪達屬意賓特尼奴打正選，馬天尼斯經協商後求去，於9月中以2000萬鎊轉投阿士東維拉，轉會後嘅馬天尼斯表現生猛，開季至今13場英超全部正選把關，錄得8場保持清白，維拉成為最大得益者。

緊隨馬天尼斯之後嘅，係曼城巴西鋼門艾達臣摩拉斯，保持7場不失球，之後就係修咸頓門將阿歷士麥卡菲及昨晚倫敦打吡對阿仙奴失3球嘅艾度亞文迪，各有6場不失球，至於艾利臣比加、迪基亞等星級門將，只有3場不失球，排名較後。

睇見馬天尼斯嘅際遭，令人想起曼聯都有位阿根廷門將羅美路，羅美路一直係曼聯嘅盃賽門將，但今季未獲上陣機會，如果佢學馬天尼斯咁向外闖，話唔定見到另一片天空。