曼聯補時3分鐘絕殺狼隊！升上第2位
20201230
東網電視
更多新聞短片
(Getty Images)
澳職開鑼，即上《澳職刨績王》：
周三(30日)凌晨英超好戲連場，其中曼聯喺主場憑拉舒福特補時3分鐘，射入全場唯一入球，以1比0擊敗狼隊，升上聯賽榜第2位，僅落後榜首利物浦2分，自傳奇主帥費格遜2013年退休之後，曼聯再現爭標霸氣。
曼聯今季英超主場成績欠佳，今場亦幾乎先失守，狼隊中場魯賓尼維斯禁區內勁射，僅被門將迪基亞救出，踢到23分鐘，摩天奴開出罰球，狼隊中堅路曼沙斯頭槌攻門，中橫楣唔入，曼聯真係抹一額汗。
其後紅魔鬼展開反擊，先有卡雲尼頭槌攻門斜出，般奴費南迪斯近門凌空抽射，僅被門將魯爾柏迪斯奧救到。
換邊之後，卡雲尼曾經將皮球送入網，但因為越在先，慘食詐胡。比賽踢到補時3分鐘，終於打破僵局，般奴費南迪斯後場大腳長傳，拉舒福特接應帶入禁區右路，再憑個人技術，扭入中路起腳射入，絕殺狼隊。
拉舒福特呢個入球，係自2009年9月奧雲後備上陣補時5分鐘入波之後，曼聯近11年英超主場最遲嘅致勝入球，福仔亦打破個人845分鐘英超主場入球荒。