曼聯險勝維拉響頭炮 追到同利物浦同分! 

20210102
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
曼聯2021年第1擊有好開始,周六(2日)凌晨英超主場迎戰大勇嘅阿士東維拉,苦戰下憑安東尼馬迪爾同般奴費南迪斯入波贏2比1,依家16戰得33分追平榜首利物浦,只係得失球冇咁好而排第2位。
曼聯今場再派保羅普巴同般奴費南迪斯中場合作,球隊演出亦相當對辦,40分鐘雲比沙卡右路傳中,安東尼馬迪爾接應頂成1比0。維拉核心基亞利殊58分鐘交出靚助攻,貝特蘭查奧爾無人看管下射入為客隊追平,但維拉開心咗只係2分鐘,保羅普巴殺入禁區博到12碼,般奴費南迪斯操刀射入,帶領曼聯最終贏2比1完場。曼聯依家正經歴聯賽10場不敗強勢,自費格遜退休之後,今次係曼聯第2次錄得英超10場不敗走勢,而第1次就係蘇斯克查啱啱接手曼聯嗰陣。
「紅魔鬼」過去1年進步神速,上年今日曼聯只排第5位,落後榜首利物浦27分之多,但依家佢哋已經同榜首利物浦同分。若果唔計第1輪賽事,今次係自2009年之後,首次出現利物浦、曼聯並列聯賽榜首情況,亦令今個月中「雙紅會」更加受到期待。