摩連奴撐卡尼踩般費：有人靠12碼都入10球

《英超刨績王》加強版，最強數據一網打盡：http://win.on.cc/football/　

熱刺上場英超以3比0大勝列斯聯，前鋒哈利卡尼射入1球12碼及貢獻1次助攻，佢今季聯賽已經做出「雙雙」，累積入10球及11次助攻，認真犀利。賽後熱刺領隊摩連奴不忘趁機「抽水」，暗寸曼聯中場般奴費南迪斯淨係識靠射12碼入波。

摩連奴先係大讚孫興民表現出色：「孫興民攞到2020年普斯卡斯獎，佢已經為熱刺入咗100球，唔計12碼，佢應該係英超前3位最佳射手之一。有部份球員靠主射12碼，都可以入到10球，但我並唔係講哈利卡尼。」

雖然摩連奴冇開名，但明眼人都知佢寸緊曼聯中場般奴費南迪斯，呢位葡萄牙國腳上年年初登陸英超後，已經射入9球12碼，佢今季聯賽11個入球之中，亦有5球來自12碼。

至於哈利卡尼今季10個聯賽入球，只有3球係12碼，孫興民入12球，更加冇12碼，摩連奴認為呢2位愛將入球「含金量」較高，寸爆般奴費南迪斯入波數字有水份。