荷蘭主帥開腔：雲迪碧克盡快離開曼聯

《英超刨績王》加強版，最強數據一網打盡：http://win.on.cc/football/　

荷蘭主帥「細孖」法蘭迪保亞表示，為了今夏歐洲國家盃，雲迪碧克必須喺冬窗期把握機會離開曼聯，建議佢去西甲搵班落爭取上陣機會，仲話英超打法唔適合佢。

雲迪碧克去年夏天以3900萬鎊加盟曼聯，但紅魔鬼中場迫爆人，出場順序雲迪碧克排都好後，今季英超只曾2次正式上陣，近3場聯賽更加被剔出大名單，剛出局嘅英聯盃4強，佢喺87分鐘後備入替，根本幫唔到手。

法蘭迪保亞表示：「歐國盃就快到，如果佢想入選大軍，佢就要同球會好好討論要如何安排，我唔知幕後發生咩事，如果大家為件事好，就應該安排雲迪碧克外借或出售。」

據報道，在曼聯簽入雲迪碧克前，其實皇馬同佢斟過，但最終因為疫情等因素放棄。「細孖」指出：「英超需要多跑動，個波喺空中飛行，西甲就需要配合同走位，英超賽場限制咗雲迪碧克。」