維拉擬派U23鬥利物浦　修咸頓賽事取消

足球博彩神器，每日重心提供盡在《彩報》：http://win.on.cc/football/　

英足盃第3圈賽事大混亂，多場比賽受到新冠肺炎疫情爆發影響，最矚目嘅當然係阿士東維拉主場對利物浦嘅大戰，由於維拉一隊出現大規模確診，一隊所有職、球員都已經即時隔離，據英國《每日郵報》消息，維拉為咗令呢場賽事如期舉行，準備安排U23同U19球員上陣，一眾青年軍球員周四(7日)已經被安排快速檢測，如果全部證實冇染疫嘅話，就會代表維拉出戰利物浦。

除維拉大戰利物浦之外，多場英足盃都受到影響，修咸頓主場對梳士貝利一仗，由於客隊日前檢測有10人確診，賽事已經宣布取消，梳士貝利希望能夠另覓日期再戰，英足總會喺下星期作出決定。另外，英冠球會打比郡作客佐利前爆發疫情，包括臨時領隊朗尼在內嘅全部一隊球員都唔會上陣，預計打比郡會派出青年軍球員出戰；至於賓福特對米杜士堡嘅賽事，由於米杜士堡近日有多人染疫，訓練場亦喺星期一起已經關閉，令今場賽事舉行成疑。