查奧爾破11個月入球荒　狼隊破宮搶盃

澳職開鑼，即上《澳職刨績王》：https://win.on.cc/football/league/aleague/index.html　

周六(9日)凌晨英足盃第3圈賽事，狼隊主場以1比0擊敗水晶宮，西班牙翼鋒艾達馬查奧爾一箭定江山，打破佢喺所有比賽接近11個月嘅入球荒。

面對緊密賽程，唔少球隊都會喺英足盃輪換，不過狼隊似乎決心爭盃，今場只係作出2個調動，相反水晶宮就收起韋費特沙夏等多位主力。狼隊今場佔盡優勢，但係喺魯爾占美尼斯缺陣下把握力差，前鋒法比奧施華更失機頻頻，好在最終靠艾達馬查奧爾喺35分鐘轟入世界波，小勝1比0晉級。

艾達馬查奧爾上一個入波，已經係上年2月尾歐霸盃對愛斯賓奴，今場入波打破差唔多11個月嘅入球荒。不過，呢位西班牙翼鋒比賽尾段疑似大腿受傷被換走，領隊紐奴賽後就話相信係疲勞問題引起不適，估計唔係嚴重受傷。