好事成雙！A米贏波仲有伊巴謙莫域復出

《串績王》新登場，最強博彩盤路過關神器：http://win.on.cc/football/　

意甲勁旅AC米蘭好事成雙，喺周日(10日)凌晨意甲主場以2比0擊敗拖連奴，繼續穩坐榜首之位，而且球隊仲迎來好消息，養傷多時嘅射手伊巴謙莫域已痊愈，並後備上陣復出，大大提升A米爭標本錢。

伊巴謙莫域養傷期間，20歲前鋒拉菲爾利亞奧有唔錯表現，佢今場又有佳作，開波25分鐘射入，為A米打開紀錄，呢位葡萄牙新星近3場意甲射入2球。

踢到36分鐘，AC米蘭拉開紀錄，巴謙戴亞斯扭入禁區，被對手比洛迪踢跌，球證睇完VAR後判罰12碼，基斯爾主射入網成2比0。值得一提，AC米蘭近2季聯賽已經獲得20個12碼，5大聯賽之中僅次於獲得22個12碼嘅拉素。

戰至85分鐘，球迷最期待畫面終於出現，伊巴謙莫域後備上陣，係呢位39歲瑞典老將自上年11月尾受傷之後，首次參加比賽。不過，A米中場辛度東拿利今場受傷，需要用擔架抬離場，傷勢唔輕，可能會缺陣一段時間。