些路迪集訓累13球員隔離　失分攞嚟衰

《英超刨績王》加強版，最強數據一網打盡：http://win.on.cc/football/　

蘇超勁旅些路迪周二(12日)主場被喜伯年逼和1比1，依家落後榜首格拉斯哥流浪21分之多，衛冕機會非常渺茫。些路迪今場失分可以話係攞嚟衰，球隊早前喺疫情下爭議性飛去杜拜集訓，連重傷要抖4個月嘅基斯杜化祖利安都帶埋去，結果返蘇格蘭後，基斯杜化祖利安被確診新冠肺炎，領隊連儂以及13名球員都要隔離，搞到作客喜伯年要殘陣出戰。

些路迪今場喺半隊主力缺陣下，苦戰到82分鐘由大衛端布爾入波，點知去到補時階段被喜伯年嘅奇雲尼斯畢攻陷，繼上輪輸畀格拉斯哥流浪後再次失分，衛冕機會名存實亡。雖然搞出大頭佛，但今仗代連儂領軍嘅加雲史特根就話唔後悔搞杜拜集訓：「我哋年年都去杜拜冬訓，而且有好好成果，今次我哋係獲得批准先去，遺憾嘅係有人確診，呢啲事任何時候都有機會發生。」