普巴一箭定江山!曼聯贏波升榜首

2021年01月13日 08:01
東網電視
更多新聞短片
(Getty Images)
《英超刨績王》加強版,最強數據一網打盡:http://win.on.cc/football/ 
周三(13日)凌晨英超,曼聯憑保羅普巴射入全場唯一入球,作客以1比0擊敗般尼,取得聯賽3連勝,並以3分優勢力壓利物浦,升上榜首,為下周一(18日)凌晨「雙紅會」作客利物浦壯行色。
曼聯近期走勢凌厲,加上卡雲尼復出踢正選,即使作客,都一開波就強攻對手,先有般奴費南迪斯勁射被般尼門將尼克普比沒收,跟住安東尼馬迪爾打倒掛,被對方守將馬菲路頓擋出,呢位法國國腳之後仲有1次射門僅斜出。
踢到36分鐘,曼聯曾經將皮球送入網,當時勞基梳爾傳中,哈利馬古尼頂入,但被球證吹越位在先,慘食詐胡。臨完上半場,安東尼馬迪爾勁射直飛死角,但被尼克普比神勇救出。
曼聯下半場繼續向對手壓施,卡雲尼、般奴費南迪斯起腳都無功而還,直至71分鐘,終於打破僵局,保羅普巴喺中場爭頂成功,般奴費南迪斯傳畀右路嘅拉舒福特,「福仔」再傳中,保羅普巴後上凌空抽射,省中對手馬菲路頓,改變方向入網。
呢球波普巴由爭贏控球權,再跟進射入,可以話係自編自導自演。拉舒福特傳送亦恰到好處,佢近14場英超創造11個入球,包括射入6球及5次助攻。
曼聯領先之後,繼續搶攻,但安東尼馬迪爾錯失多次入球機會,最終小勝1比0,已夠做一哥,如果唔計球季首日賽事,今次係曼聯自2017年9月15日以來首次升上英超榜首。
與此同時,亦係曼聯自2013年由費格遜領軍奪得英超冠軍之後,首次喺聖誕節之後,穩坐榜首之位,重現昔日王者霸氣。