零下7度比賽!馬體會兩蛋贈西維爾

2021年01月13日 12:01
東網電視
更多新聞短片
(Getty Images)
《串績王》新登場,最強博彩盤路過關神器:http://win.on.cc/football/ 
西班牙近期受大風雪吹襲,周三(13日)凌晨西甲馬德里體育會主場對西維爾,雙方喺攝氏零下7度比賽,馬體會不愧為榜首勁旅,無懼惡劣天氣,以2比0擊敗西維爾,領先第2位皇馬4分,兼踢少2場,進一步鞏固一哥地位。
馬體會今季踢到着晒火,即使天氣嚴寒都影響唔到佢哋發揮,開賽17分鐘就入波,捷比亞右路傳中,安祖哥利亞接應之後,再轉身抽射入網。
西維爾失波之後,積極反撲,但馬高斯阿古拿勁射斜出,拿傑迪錫遠射亦唔中目標。跟住馬體會神鋒蘇亞雷斯亦有2次起腳,可惜無功而還。
換邊後初段,西維爾幾乎可以扳平,安尼斯利攻門,但被馬體會門將奧比歷救出。馬體會避過一劫,果然有後福,踢到76分鐘,後備上陣嘅沙奧尼古斯喺禁區頂射入成2比0,協助馬體會取得西甲5連勝。
另外,馬體會宣布將20歲左閘文奴山齊士外借去奧沙辛拿,直至今季結束,呢位小將上季出道以來,至今只為馬體會喺西甲上陣5次,以及踢過1場西班牙盃,會方將佢外借去奧沙辛拿,希望佢汲取更多比賽經驗。