離開紅魔變動力 查理史葛喺香港正名

2021年01月13日 21:00
東網電視
更多新聞短片
「碧咸、史高斯、傑斯、尼維利兄弟……」曼聯的青訓成果一向享負盛名,當中92年黃金一代更無人不曉。惟背負着「曼聯青訓」的壓力,並非每個年輕球員皆能承受!23歲的查理史葛(Charlie)便是其中之一,2018年夏天被曼聯解約後陷入人生低潮,去年夏天毅然遠赴香港:「期望自己能夠回復最佳狀態,喺愉園再次尋找生涯第2春!」■圖、文:李浚湣
「上網搵過之後,知道有好多前曼聯球星都喺香港踢過波,好似畢特同科蘭,分別效力過南華同傑志。」查理史葛笑言對香港認識不深,曾想過到其他國家發展,包括中國、西班牙等,惟Charlie對最終決定來港感高興,認為港超聯非常適合自身發揮:「呢度節奏相對較慢,中場有多啲時間拎住個波組織,令自己更容易以長傳去幫助球隊進攻。」
Charlie身為前曼聯青年軍球員,實力絕不容忽視。對於今季個人目標,這名英格蘭中場亦甚具野心:「我嚟香港當然想贏錦標,希望『菁英盃』入到決賽同拎冠軍。另外『足總盃』雖然同組對手相當強,但我覺得球隊都有機會,球員必須對自己保持信心。」除此之外,愉園陣中有不少年輕球員,Charlie希望成為好榜樣:「好多都相當有潛質,我會利用自身經驗幫佢哋成長,同埋改善一直嘅弱點。」
「希望可以發揮自己潛力,盡量踢到更高水平聯賽,而最大夢想當然係踢英超啦!」這個目標對目前在港超聯效力的球員看似是遙不可及,惟Charlie年僅23歲,仍屬年輕,暫時已為愉園正選上陣6場賽事,成為球隊不可或缺的一員,他亦對自己的表現感滿意:「10分滿分,暫時表現都有7至8分,每場比賽後狀態都持續改善,希望可以盡快復操同比賽。」
Profile
姓名:Charlie Thomas Scott
身高:1米85
出生日期:1997年9月2日
國籍:英格蘭
司職:防守中場
學懂面對壓力
「英國人人都夢想成為職業足球員,競爭相當大,再加上曼聯係一支大球會,好多人都會關注,甚至唔抵得你嘅成功。」Charlie在曼聯度過了14個年頭,承認壓力是令其職業生涯停滯不前的主因,除了教練和球迷對自己有很高期望外,他亦認為當地傳媒對年輕球員構成很大影響:「佢哋好少幫我哋,只係不斷出負面報道,以惡意批評去博取讀者關注。」
被曼聯放棄後,Charlie承受不了沉重打擊,曾一度放棄足球,惟深信自己在短短3年間成長不少,尤其在性格和心態上:「當受到其他人嘅嘲笑、抨擊時,我唔會再感到憤怒,反而係勇敢面對,並且努力改善問題,去證明畀人睇我嘅實力。」今次來港延續其職業生涯,他期望重拾對足球的熱情:「目前最重要係拋低之前嘅身份,唔好畀自己任何壓力,由零開始重新享受足球。」
享受成為焦點
查理史葛自6歲開始加入曼聯青訓系統,然而具潛質的新星多不勝數,導致Charlie經常被外界遺忘。來到香港後,這名「紅魔仔」卻迅速成為傳媒及球迷焦點,他坦言自己性格較害羞、安靜,一開始不太習慣,但亦能夠理解:「喺曼聯嗰陣有好多個球星,但嚟到香港之後得番你1個,所以畀人關注都好正常,但球迷全部都好好人,經常收到佢哋喺社交媒體嘅支持同祝福,自己首次成為眾人焦點,所以都好開心。」