戴巴拿抖20日　錯過3線作戰

《串績王》新登場，最強博彩盤路過關神器：http://win.on.cc/football/　

祖雲達斯上輪意甲擊敗薩斯索羅，有3位球員受傷，包括保羅戴巴拿、韋斯頓麥堅尼、費達歷高基艾沙，當中以阿根廷射手保羅戴巴拿比較嚴重，需要抖15至20日，除咗無緣周四(14日)凌晨意大利盃對熱拿亞之外，亦會缺陣意甲對國際米蘭，以及意超盃對拿玻里。

保羅戴巴拿該仗踢到臨完上半場，同對手相撞之後，左膝落地受傷，退下火線，經過檢查後，發現佢左膝韌帶受傷，預料需要休息15至20日，所以意大利盃對熱拿亞，固然唔使預佢，最大鑊係踢唔到下周一(18日)凌晨對國際米蘭嘅意甲大戰。

同埋由於意大利足總已經落實今屆意超盃將於香港時間1月21日凌晨舉行，由上季意甲冠軍祖雲達斯對意大利盃盟主拿玻里，意味保羅戴巴拿都會缺陣，祖記惟有靠C朗同艾華路莫拉達攻堅。

至於韋斯頓麥堅尼、費達歷高基艾沙嘅傷勢比較輕微，應該可以上陣對國際米蘭。