連隊友都驚尼格度:佢好似冇頭髮版嘅雷神!

2021年01月14日 00:10
東網電視
更多新聞短片
《串績王》新登場,最強博彩盤路過關神器:http://win.on.cc/football/ 
西甲新升班球隊卡迪斯,今季表現令人喜出望外,分別曾擊敗巴塞隆拿及皇家馬德里2支傳統班霸,目前更加排在聯賽榜第9名,好大機會下屆繼續留返喺西甲。然而球隊陣中並冇太多球星,最大名氣非尼格度莫屬,近日依位前曼城及西班牙國家隊前鋒,就畀隊友笑佢似雷神,足以證明球隊內部氣氛唔錯。
早前卡迪斯3位球員,包括後衞艾錫卡些倫、中場阿歷斯費南迪斯同老將尼格度,就出席左由西甲賽會舉行嘅網上訪問,當中主持人突然問艾錫卡些倫,點解雷神係佢最鐘意嘅超級英雄,艾錫卡些倫笑言:「因為雷神係閃電之神,仲可以周圍用雷神之槌扑人,同埋佢唔會死。」
之後主持人再問佢,2個之中會揀邊個陪佢接受肺炎測試,艾錫卡些倫即刻答阿歷斯費南迪斯,而當中嘅原因更令全場人笑唔停口:「因為尼格度好似冇頭髮版嘅雷神一樣,佢好大隻,我驚佢會拎住枝擺落鼻嘅測試棒,唔知對我做啲咩。」
不過尼格度對球隊相當重要,今季為卡迪斯喺聯賽射入3球,成為球隊首席射手,睇嚟隊友都應該係講吓笑,希望依位35歲老將唔會嬲啦!