尼馬復出入波 肥普教3場PSG就捧盃

2021年01月14日 08:01
東網電視
更多新聞短片
澳職開鑼,即上《澳職刨績王》:
周四(14日)凌晨舉行嘅法國冠軍盃,上季國內3冠王巴黎聖日耳門(PSG)以2比1擊敗馬賽,連續8屆奪得呢項錦標。PSG新帥普捷天奴領軍第3場,就有盃落袋,認真高效率,亦係佢教波生涯首個冠軍,同埋球星尼馬傷愈復出,仲射入1球12碼成為贏波功臣,PSG好事成雙。
普捷天奴重用阿根廷同胞莫路伊卡迪,由佢今場同基利安麥巴比、迪馬利亞正選合作攻堅。莫路伊卡迪不負所托,繼上場法甲1射1傳之後,今場亦有出色表現,開波17分鐘就有1次頭槌攻門,僅貼柱出界。呢位27歲射手轉個頭將皮球射入空門,可惜越位在先,被判無效,拍檔基利安麥巴比亦有1次入波被吹越位。
PSG嘅努力始終有回報,踢到39分鐘,迪馬利亞右路傳中,莫路伊卡迪頭槌攻門,雖然被馬賽門將文丹達撲出,但佢立即補射入網,為PSG打開紀錄。文丹達失守之餘,之後更加不幸傷出。
戰至65分鐘,球迷最期待畫面出現,養傷近1個月嘅尼馬後備上陣復出,踢到81分鐘,莫路伊卡迪博到12碼,由尼馬主射入網。雖然馬賽臨完場追番1球,都無阻PSG奪冠,普捷天奴12年教波生涯,終於獲得首個錦標。
「肥普」教波生涯頭513場比賽,都冇盃捧,但執教PSG僅3場就有盃落袋,可見「選擇比努力重要」,證明佢今次冇揀錯球隊。