熱刺捉鹿唔識脫角　今季第5次被逼和

《英超刨績王》加強版，最強數據一網打盡：http://win.on.cc/football/　

周四(14日)凌晨英超「臨時加插」嘅倫敦打吡，熱刺喺領先下被作客嘅富咸逼和1比1，錯失升上聯賽第3位嘅機會，領隊摩連奴賽後承認球隊「捉鹿唔識脫角」，成為佢哋今季爭標嘅最大障礙。

由於維拉爆發新冠肺炎疫情，原本維拉對熱刺嘅比賽取消，臨時改踢熱刺對富咸嘅賽事，富咸領隊柏卡形容呢個做法係「醜聞」。熱刺今場25分鐘由哈利卡尼插水式頭槌先開紀錄，不過富咸門將艾路拿之後「上身」屢救險球，最終喺74分鐘由艾雲卡華利路接應傳中頂入追成1比1平手。

熱刺領隊摩連奴賽後表示：「我哋今場有好多機會可以鎖定勝局，部份原因係艾路拿太厲害，但係就算入唔到第2球，都唔應該失球，呢個情況幾乎由球季開始已經不斷發生。」熱刺今季有6場和波，當中5場都係領先情況下被逼和，最經典係季初領先3球下，被韋斯咸逼和3比3。