驚天大冷門!拜仁被乙組仔淘汰

2021年01月14日 11:03
東網電視
更多新聞短片
(Getty Images)
《串績王》新登場,最強博彩盤路過關神器:http://win.on.cc/football/ 
周四(14日)凌晨德國盃第2圈爆出大冷門,「五冠王」拜仁慕尼黑竟然被乙組球隊基爾淘汰,拜仁1.07倍超熱客W同1.03倍「晉級隊伍」都開唔出,亦係呢支德甲豪門自2004年以來,首次被低組別球隊踢走,非常失威,宣布衞冕德國盃失敗。
雖然話拜仁慕尼黑教練費歷克今場作出5個正選輪換,但仍然有門將紐亞、甘美治、湯馬士梅拿、利萊辛尼、基拿比等主力,人腳實力明顯凌駕對手,並由基拿比喺14分鐘打開紀錄。不過,拜仁防線不穩,37分鐘基爾一下長傳突擊,巴迪爾斯單刀射入扳平。
拜仁下半場開波迅速由利萊辛尼射入罰球,再次領先,其後仲換入首席射手羅拔利雲度夫斯基,希望盡快解決對手。點知拜仁拉唔開紀錄之餘,更於補時5分鐘,被基爾中堅侯基華爾近門頂入逼和2比2,需要以互射12碼分勝負。
雙方頭5輪都射入,去到突然死亡階段,拜仁後備上陣嘅馬克洛卡主射,被基爾門將基利奧斯撲出,基爾由巴迪爾斯射入,爆大冷淘汰拜仁。
拜仁慕尼黑繼上場德甲輸畀慕遜加柏之後,今場德國盃亦出局,莫非難逃盛極而衰嘅宿命?