奧巴美揚撻着!阿仙奴力搶4連勝

2021年01月14日 18:00
東網電視
更多新聞短片
《串績王》新登場,最強博彩盤路過關神器:http://win.on.cc/football/ 
今晚英超獨腳戲兼「倫敦打吡」,阿仙奴主場硬撼水晶宮。「兵工廠」阿仙奴雖有加比爾馬天尼利因傷缺陣,好彩隊長奧巴美揚重拾射門鞋,挾住聯賽3連勝兼英格蘭足總盃晉級之勢,面對低迷嘅水晶宮,有望再下一城,主勝穩開。(Now 621周五凌晨4時直播)
阿仙奴近期喜訊不斷,日前喺英足盃賽前受傷嘅加比爾馬天尼利,儘管應該趕唔切今仗復出,不幸中之大幸係佢傷勢唔算嚴重,下仗隨時可以復出,要知道「兵工廠」成功從谷底反彈,佢同伊美路維、布卡約沙卡嘅「青春3人組」居功至偉,「小天馬」冇事相信可穩定軍心。隨住阿仙奴於聯賽連贏車路士、白禮頓及西布朗後,日前英足盃第3圈對紐卡素,主帥阿迪達特登收起伊美路維同布卡約沙卡,畀韋利安、祖爾韋洛克、雷斯尼爾遜打正選,可惜佢哋堅唔爭氣,最終兩個後生仔都要後備落場,結果仲靠「路維仔」喺加時先開紀錄,證明佢哋確係夠料擔正。
嗰場英足盃末段奧巴美揚整多粒,協助衞冕嘅「兵工廠」苦戰下贏2比0晉級,雖然只係錦上添花,但對於陷低潮嘅奧巴美揚嚟講非常重要。尤其係睇住另一箭頭拿卡錫迪近5仗入咗5粒,與「青春3人組」分外合拍,奧巴更需要用入波攞番信心,由於「小天馬」唔出得,相信呢位隊長同拿卡錫迪會齊齊擔正爭取士哥。
水晶宮防線多傷兵
另一邊廂,水晶宮喺今個冬天特別冷,連同上年12月中慘吞利物浦7蛋開始計起,近5仗只得1勝1和3負,包括日前英足盃畀狼隊踢出局,士氣低落。而且防線係重災區,馬馬度沙高啱啱復出又告受傷,加利卡希爾及史葛丹恩等主力中堅亦未好番,焗用防中高耶迪移後客串,唔慌穩陣;前線只靠韋費特沙夏單天保至尊,佢萬一失靈,水晶宮嘅進攻即刻癱瘓,老帥鶴臣真係冇晒計。阿仙奴唔單止聯賽3連勝,今季4次出戰「倫敦打吡」,亦獲得3勝1負,面對沉爆嘅水晶宮可望食住上,主勝熱得有理。